Прысвячэнне сябе самога
Езусу Хрысту, Уцелаўлёнай Мудрасці, праз рукі Марыі
О Спрадвечная і Ўцелаўлёная
Мудрасць! О любы і годны пакланення Езу, сапраўдны Бог і сапраўдны Чалавек,
адзіны Сын Спрадвечнага Айца і Марыі, заўсёды Дзевы! Аддаю Табе глыбокую пашану
ва ўлонні і глыбіні Твайго Айца, у вечнасці, і ў дзявоцкім улонні Марыі, Тваёй
годнай Маці, у хвіліну Твайго ўцелаўлення.
Дзякую Табе за тое, што Ты
прынізіў Сябе і прыняў постаць нявольніка, каб вызваліць мяне з жудаснага
нявольніцтва дэмана.
Праслаўляю Цябе і ўсхваляю за тое,
што Ты пажадаў ува ўсім быць паслухмяным Марыі, Тваёй святой Маці, каб праз Яе
ўчыніць мяне Сваім верным нявольнікам. На жаль, я быў няўдзячным і нясталым, а
таму не захаваў вернасці абяцанням, якія ўрачыста склаў падчас Святога Хросту.
Я не выканаў сваіх абавязкаў і таму не заслугоўваю таго, каб называцца Тваім
дзіцём і Тваім нявольнікам. І, паколькі ўсё ўва мне заслугоўвае Твайго гневу, я
не асмельваюся больш сам наблізіцца да Тваёй святой велічы.
Таму я прашу заступніцтва
і міласэрнасці ў Тваёй Святой Маці, якую Ты даў мне як Пасрэдніцу перад Тваім
Абліччам. Менавіта праз Яе я спадзяюся атрымаць ад Цябе ласку скрухі сэрца і
прабачэння маіх грахоў, ласку атрымаць і захаваць Мудрасць.
Таму вітаю Цябе, о Беззаганная
Марыя, жывы Табернакль Боскасці, дзе схаваная Спрадвечная Мудрасць жадае быць
ушанаваная анёламі і людзьмі.
Вітаю Цябе, Каралева Неба і зямлі,
Табе падпарадкоўваецца ўсё, акрамя Бога.
Вітаю Цябе, надзейны прытулак
грэшнікаў, Твая міласэрнасць ахоплівае ўсіх. Выслухай маю просьбу, поўную
жадання мець Боскую Мудрасць, і прымі дзеля гэтага абяцанні і ахвяры, якія Табе
прыносіць мая мізэрнасць.
Я, (Імя), няверны грэшнік,
аднаўляю сёння і складаю ў Твае рукі мае абяцанні, якія я прынёс падчас Святога
Хросту. Я навечна выракаюся шатана, яго пыхі і яго справаў і цалкам аддаюся
Езусу Хрысту, уцелаўлёнай Мудрасці, каб несці свой крыж кожны дзень свайго
жыцця, каб быць больш верным Яму, чым дагэтуль.
Я абіраю Цябе сёння, у прысутнасці
ўсяго нябеснага двара, за сваю Маці і Гаспадыню. Аддаю Табе і прысвячаю ў
якасці нявольніка маё цела і маю душу, мае даброты ўнутраныя і знешнія і нават
вартасць маіх добрых учынкаў мінулых, сённяшніх і будучых. Пакідаю табе поўнае
права распараджацца мной і ўсім, што мне належыць, без выключэння, як Ты гэтага
пажадаеш, дзеля большай хвалы Божай цяпер і на вякі.
Прымі, о дабразычлівая Дзева,
гэтую маленькую ахвяру майго нявольніцтва ў знак пашаны і еднасці Твайго
Мацярынства са Спрадвечнай Мудрасцю. Прымі гэта як ушанаванне Вашай супольнай
улады над гэтай маленькім чарвяком і нягодным грэшнікам, якім я з’яўляюся, а
таксама як падзяку за прывілеі, якімі Цябе абдаравала Святая Тройца.
Я заяўляю, што з гэтага моманту як
Твой сапраўдны нявольнік я жадаю шукаць толькі Тваёй хвалы і ўва ўсім быць
паслухмяным.
O цудоўная Маці! Прадстаў мяне
Твайму Сыну як вечнага нявольніка, каб, адкупіўшы мяне праз Цябе, Ён таксама
прыняў мяне праз Цябе.
O Маці міласэрнасці! Удзялі мне
ласку атрымаць сапраўдную мудрасць Божую і быць у ліку тых, каго Ты любіш,
навучаеш, кіруеш, насычаеш і абараняеш як Сваіх дзяцей і нявольнікаў.
O Дзева верная, зрабі мяне
дасканалым вучнем ува ўсім, паслядоўнікам і вучнем уцелаўлёнай Мудрасці, Езуса
Хрыста, Твайго Сына, каб праз Тваё заступніцтва і па Тваім прыкладзе я дасягнуў
поўні Яго веку на зямлі і Яго хвалы ў небе. Амэн.
