Звычайныя практыкаванні
[115] Існуе шмат унутраных
практыкаванняў сапраўднага ўшанавання Найсвяцейшай Дзевы. Вось самыя галоўныя ў
некалькіх словах:
1. Ушаноўваць Яе як годную Маці
Бога ў выглядзе культу гіпердуліі[1]. Гэта азначае паважаць і ўшаноўваць Яе па-над усімі іншымі святымі як архісправу
ласкі і першую пасля Езуса Хрыста, сапраўднага Бога і сапраўднага Чалавека.
2. Разважаць над Яе цнотамі,
прывілеямі і чынамі.
3. Сузіраць Яе веліч.
4. Чыніць дзеля Яе акты любові,
праслаўлення, удзячнасці.
5. Сардэчна заклікаць Яе.
6. Аддаць сябе Ёй і з’яднацца.
7. Рабіць усё так, каб Ёй падабацца.
8. Пачынаць, працягваць і скончваць
усе свае справы праз Яе, у Ёй, з Ёй і дзеля Яе, каб рабіць усё праз Езуса, у
Езусе, з Езусам і дзеля Езуса — нашай канчатковай мэты. Я растлумачу потым
гэтае апошняе практыкаванне.
[116] Сапраўднае ўшанаванне Святой Дзевы мае таксама мноства знешніх практыкаванняў.
Вось самыя галоўныя з іх:
1. Уступіць у
якое-небудзь марыйнае брацтва ці супольнасць.
2. Уступіць у ордэн, заснаваны ў Яе гонар.
3. Праслаўляць Яе.
4. Даваць ахвяру, захоўваць пост і
ўтаймоўваць плоць ў Яе гонар.
5. Насіць Яе знакі — напрыклад,
ружанец, шкаплер ці маленькі ланцужок.
6. Уважліва, пабожна і стрымана
маліцца ружанец, які складаецца з пятнаццаці дзесяткаў «Вітай, Марыя» ў гонар
пятнаццаці галоўных таямніцаў Езуса Хрыста, або адну з трох яго частак[2]: радасную (Звеставанне, Наведванне Святой Альжбеты, Нараджэнне Езуса
Хрыста, Ахвяраванне Езуса ў святыні, Знаходжанне Езуса ў святыні); балесную
(Малітва ў садзе Аліўным, Бічаванне, Укаранаванне цернем, Нясенне крыжа, Смерць
на крыжы); хвалебную (Уваскрашэнне, Унебаўшэсце, Спасланне Духа Святога,
Унебаўзяцце Марыі, Укаранаванне Марыі на Каралеву Неба і зямлі). Можна маліцца ружанец, які складаецца з шасці ці сямі дзесяткаў — у гонар
тых гадоў, што, як лічыцца, Святая Дзева пражыла на зямлі. Або маленькі вяночак
да Святой Дзевы з трох “Ойча наш” і дванаццаці «Вітай, Марыя» ў гонар Яе кароны
з дванаццаці зорак або дванаццаці прывілеяў. Можна таксама маліцца Гадзінкі да
Святой Дзевы, паўсюдна прынятыя і ўжываныя ўва ўсім Касцёле; або Малы Псалтыр
да Святой Дзевы, які святы Банавентура напісаў у Яе гонар. Ён настолькі прыгожы
і пабожны, што нельга чытаць яго без захаплення. Можна маліцца чатырнаццаць
«Ойча наш» і «Вітай, Марыя» ў гонар чатырнаццаці Яе радасцяў або якія-небудзь
іншыя гімны ці ўрачыстыя песні Касцёла, як, напрыклад, «Salve Regina», «Alma Redemptoris Mater», «Ave Regina coelorum», «Regina coeli», згодна з перыядам
літургічнага года або «Ave maris Stella», «O gloriosa Domina», «Magnificat» ці нейкія іншыя пабожныя малітвы, якімі перапоўненыя малітоўнікі.
7. Спяваць у Яе гонар духоўныя
спевы і заахвочваць да гэтага іншых.
8. Укленчыць дзеля Яе пэўную
колькасць разоў ці пакланіцца, паўтараючы Ёй пры гэтым, напрыклад, кожную
раніцу ад шасцідзесяці да ста разоў: «Ave Maria, Virgo Fidelis» («Вітай, Марыя, Дзева верная»), каб выпрасіць праз Яе ў Бога вернасць
ласкам на працягу ўсяго дня, а ўвечары паўтараць: «Ave Maria, Mater misericordiae» («Вітай, Марыя, Маці міласэрнасці»), каб праз Яе
выпрасіць у Бога прабачэнне грахоў, учыненых на працягу дня.
9. Падтрымліваць Яе брацтвы,
упрыгожваць Яе алтары, каранаваць і аздабляць Яе абразы.
10. Насіць Яе абразы ў працэсіях і
заахвочваць да гэтага іншых, а таксама насіць абразок ці медалік на сабе як
магутную зброю супраць злога.
11. Заахвочваць маляваць Яе абразы
і вешаць іх у касцёлах, дамах ці на дзвярах і брамах гарадоў.
12. Прысвяціць сябе Ёй урачыста і
выключным спосабам.
[117] Ёсць таксама іншыя практыкаванні сапраўднага ўшанавання Святой Дзевы, якія Дух Святы ўліў у сэрцы святых душаў. Яны маюць вялікую асвячальную ласку. Пра гэта можна прачытаць у кніжцы «Адчынены рай», напісанай айцом Паўлам Бары з ордэну Езуітаў. Ён сабраў у гэтым творы вялікую колькасць набажэнстваў, што практыкавалі святыя ў гонар Найсвяцейшай Дзевы. Яны цудоўна служаць асвячэнню душаў, калі іх ужываеш належным чынам. А менавіта: 1) з добрай і шчырай інтэнцыяй падабацца толькі Богу, з’яднацца з Езусам Хрыстом як са сваёй канчатковай мэтай, навучаць гэтаму іншых; 2) з увагай, без дабраахвотнай няўважлівасці; 3) з пабожнасцю, без паспешлівасці і нядбайнасці; 4) са сціпласцю, паважлівай і павучальнай паставай цела.
Дасканалыя практыкаванні
[118] Я прачытаў амаль усе кнігі пра ўшанаванне
Найсвяцейшай Дзевы, я па-сяброўску размаўляў з самымі святымі і мудрымі асобамі
свайго часу і не знайшоў пабожнага практыкавання ў гонар Святой Дзевы, падобнага
да таго, пра якое я хачу расказаць, якое патрабуе ад душы найбольшай ахвяры для
Бога, якое найбольш вызваляе душу ад сябе самой і самалюбства, якое верна
захоўвае душу ў ласцы, а ласку ў ёй, якое самым дасканалым і простым чынам
яднае з Езусам Хрыстом і, нарэшце, якое прыносіць найбольш хвалы Богу, найбольш
асвячае душу і прыносіць больш пажытку бліжнім.
[1] Трэба
адрозніваць два кшталты рэлігійнага ўшанавання: „латрыя” i „дулія”. „Латрыя” — гэта найвышэйшая пашана, якую мы
аддаем самому Богу, бо Ён бясконца дасканалы. „Дулія” — гэта пашана, якую мы
аддаем асобам створаным, бо яны маюць пэўную надзвычайную дасканаласць, якой іх
абдарыў Бог. Такая пашана належыць анёлам і святым. Найсвяцейшая Дзева Марыя па
прычыне сваёй асаблівай годнасці патрабуе асаблівага ўзроўню вышэйназванага
ўшанавання, якое мы называем „гіпердуліяй”.
[2]. З 2002 года ружанец складаецца з чатырох частак. Святы
Айцец Ян Павел II дадаў таямніцы святла: Хрост Езуса, Цуд у Кане
Галілейскай, Абвяшчэнне Божага Валадарства, Перамяненне на гары Табор,
Устанаўленне Эўхарыстыі. – Заўв. пер.).
